baat karanii mujhe mushkil kabhii aisii to na thii
jaisii ab hai terii mahafil kabhii aisii to na thii
le gayaa chhiin ke kaun aaj teraa sabr-o-qarar
be-qaraarii tujhe ae dil kabhii aisii to na thii
chashm-e-qaatil merii dushman thii hameshaa lekin
jaise ab ho gaii qaatil kabhii aisii to na thii
unakii aa.Nkho.n ne Khudaa jaane kiyaa kyaa jaaduu
ke tabiiyat merii maa_il kabhii aisii to na thii
aks-e-ruKh-e-yaar ne kis ke hai tujhe chamakaayaa
taab tujh me.n mah-e-kaamil kabhii aisii to na thii
kyaa sabab tuu jo biga.Dataa hai 'Zafar' se har baar
Khuu terii huur-e-shamaa_il kabhii aisii to na thii
----------------------------------------------------
Poet : Bahadur Shah Zafar
Subscribe to:
Post Comments (Atom)
No comments:
Post a Comment